Les étrennes du gamin

Quand r’vient l’preumi janvier, c’ess t’avec émotion

Que j’erpinse à m’jeun’ temps, à tout’ les traditions

Des nouvel an passés, quand, avec mes parints,

Je f’sos l’tournée d’étrennes selon un rit’ souv’rain.

On dallot, tout matin, visiter l’parinté,

Répétant, sans façon, « Bonne année, bonn’ santé ! »,

A l’vieill’ ma tant’ sans dints, à l’généreus’ marraine,

Au vieux mon oncl’ barbu comme à l’cousin’ germaine.

C’astot, suivant les cas, des souhaits fort sérieux,

Des fricassées d’musiaux, des complimints joyeux.

C’qui y avot d’amusant, c’est, qu’avant chaqu’ maison,

Em popa annonçot l’couleur d’el réception .

« Droci, qu’y nous disot, ça s’ra des p’tits bols bleus

Et du fayeux café, des chucs coupés in deux,

Un mélange ed biscuits ach’tés au p’tit bazar,

Mais eun’ bonn’ goutte à prones comme on n’in boit null’ part »

A l’deuxièm’ port’, ç’astot eun’ maison pus bourgeoise :

On avot des gaufrettes et d’el goutte à framboise.

D’sus l’nappe y’avot des tasses, des sous-tasses, des cuillères,

Et même eun’ pince à sucr’ dins un sucrier d’verre.

Là, j’ercevos m’bon an, eun’ pièce ed quarant’ sous,

Pour mi, eun’ vraie fortune, un trésor, un bijou !...

A l’troisièm’ port’, par contr’, chez l’vagu’ cousin mireux,

On r’fusot d’print’ quedcose : ça f’sot plaisir aux deux.

Mais i fallot quand mêm’ goûter s’goutte favorite,

Du cassis, d’un goût fade… car après chaque visite,

I r’mettot n’béquie d’iau pou rattraper l’niveau…

Pi on r’perdot no rout’ pinsant vir’ du nouviau.

Alors, à l’port’ suivant’, el caf’tière à cauchettes

Nous rattindot d’sus l’poêle in feumiant pas s’busette.

Là, on causot des gins, mingeant des macarons,

Buvant un fond d’cognac qui vous donnot l’frisson.

Ainsi, pindant longtemps, a comminché l’année,

L’estomac barbouillé mais contint d’no tournée.

Quand approchot midi, on rintrot à l’maison :

Alors, d’sus l’poêle à pot, on réchauffot l’bouillon.

On dinot sans traîner, connaissant les usages

Des cousins, des mais, des gins du voisinage,

Respectant, yeusses étout, l’programme de leu’ tournée.

Oui, l’Nouvel An, pour mi, ça s’tot eun’ bell’ journée !

J’in ai de bons souv’nirs, et m’mémoire est gardienne

Du caractère sacré des traditions anciennes.

Café, gouttes ed tout’s sortes, gaufrettes ou macarons,

Pou ercevoir leus gins, chacun avot s’façon.

Qu’ça fusse tout au matin, à midi ou au soir,

J’sus co de c’vieux temps-là, si vos volez l’savoir.

Si vous v’nez m’esbimer, vos n’aurez point d’surprises :

Vos aurez des galettes et d’el goutte à cerises…

D’après Auguste HANON, poète patoisant de l’Avesnois.